Troi Allan

Os byddwch chi’n methu talu’ch rhent, neu os yw’ch landlord yn credu eich bod chi neu rywun arall yn eich aelwyd wedi bod yn ymddwyn mewn ffordd wrthgymdeithasol, rydych chi mewn perygl o gael eich troi allan.

Mae yna bethau y gallwch chi eu gwneud i geisio atal y troi allan, ond rhaid i chi weithredu’n gyflym.

Siaradwch â’ch landlord yn gyntaf bob amser. Efallai y byddwch chi’n gallu dod i gytundeb ynghylch ad-dalu’ch rhent, neu efallai cytuno ar sesiwn gyfryngu i ddatrys unrhyw broblemau sydd gennych chi gyda chymdogion.

Os yw’ch ôl-ddyledion rhent yn ganlyniad i oedi yn eich hawliad budd-dal, efallai y bydd eich landlord yn gallu helpu i ddatrys pethau i chi.

Os nad yw costau eich budd-dal tai neu gredyd cyffredinol yn talu’ch holl rent, efallai y byddwch chi’n gallu gwneud cais am daliad tai dewisol gan y cyngor.

Am lawer o syniadau am ba bethau eraill y gallwch chi eu gwneud i geisio osgoi cael eich troi allan, cliciwch yma.

Nid oes angen rheswm ar landlordiaid preifat bob amser i’ch troi allan, ond mae’n rhaid iddyn nhw ddilyn rheolau cyfreithiol o hyd.

Mae’r rheolau y mae’n rhaid iddyn nhw eu dilyn yn dibynnu ar y math o denantiaeth sydd gennych chi.

Ar gyfer y rhan fwyaf o denantiaethau, mae 3 cham y mae’n rhaid i landlord eu cymryd:

• Hysbysiad
• Llys
• Beili

Darllenwch fwy am y camau hyn yma.

Pa fath bynnag o denantiaeth sydd gennych, a pha gam bynnag y mae troi allan ynddo, mae bob amser yn werth cael cyngor. Efallai y byddwch yn gallu atal neu ohirio’r troi allan.

Os ydych chi’n rhentu’ch cartref gan landlord cymunedol (cymdeithas dai neu’r cyngor) ac mae gennych gontract meddiannaeth diogel, yn gyffredinol mae gennych yr hawl i aros yn eich cartref oni bai eich bod yn torri rheolau eich contract meddiannaeth (dyma’r enw newydd ar gyfer ‘cytundeb tenantiaeth’).

Os yw’ch landlord yn credu y dylech gael eich troi allan, rhaid iddo ddilyn gweithdrefn gyfreithiol i wneud hynny. Mae’r weithdrefn y mae’n rhaid iddo ei chymryd yn dibynnu ar y math o gontract meddiannaeth sydd gennych.

Ar gyfer y rhan fwyaf o gontractau landlord cymunedol, rhaid i’ch landlord gymryd 3 cham i’ch troi allan:

• anfon hysbysiad i chi adael
• gwneud cais i’r llys am orchymyn meddiant
• gofyn i’r llys anfon beiliaid i’ch troi allan.

Darllenwch fwy am y camau hyn a’r hyn y mae’n rhaid i’ch landlord ei wneud cyn y gallant eich troi allan yma.

Os ydych chi’n wynebu cael eich troi allan, mae’n bwysig eich bod chi’n cael cymorth. Efallai y byddwch chi’n gallu atal neu ohirio’r troi allan.

Os nad ydych chi wedi symud allan o’ch cartref ar ôl i rybudd ddod i ben, gall eich landlord wneud cais i’r llys am orchymyn meddiant i’ch troi allan.

Yn y rhan fwyaf o achosion bydd gwrandawiad llys a bydd llythyr gan y llys yn cael ei anfon atoch i ddweud wrthych chi ddyddiad ac amser y gwrandawiad. Mae’n bwysig eich bod chi’n mynd i’r gwrandawiad oherwydd bydd gennych chi fwy o siawns o gadw’ch cartref.

Mae’n syniad da anelu at gyrraedd y llys o leiaf 30 munud cyn y gwrandawiad. Os na fyddwch chi yno mewn pryd, bydd y gwrandawiad yn mynd yn ei flaen hebdoch chi ac rydych chi’n fwy tebygol o gael eich troi allan.

Os nad oes gennych chi gynghorydd cyfreithiol yna mae gan lawer o lysoedd gynghorydd dyletswydd neu gyfreithiwr a allai allu rhoi cyngor munud olaf i chi. Gelwir y gwasanaeth hwn yn gynllun dyletswydd y llys ac mae’n rhad ac am ddim.

Dysgwch fwy am yr hyn a fydd yn digwydd yn y llys yma.

Mae’n anghyfreithlon i’ch landlord eich gorfodi o’ch cartref heb gymryd y camau cyfreithiol cywir.

Mae’n debygol y byddwch wedi cael eich troi allan yn anghyfreithlon os yw’ch landlord:

• yn eich gwneud yn gadael heb rybudd neu orchymyn llys
• yn eich cloi allan o’ch cartref.

Os bydd hyn yn digwydd i chi, dylech siarad â rhywun rydych chi’n ymddiried ynddo a chysylltu â chynghorydd cyn gynted â phosibl. Efallai y byddwch chi’n gallu mynd â’ch landlord i’r llys a dylai’r heddlu gymryd camau yn eu herbyn.

Os oes gennych chi landlord preifat, dylech chi allu cael cymorth gan eich cyngor lleol a chan Rhentu Doeth Cymru.

Sgwrsiwch ag un o’n cynghorwyr arbenigol am ragor o gyngor trwy glicio ar un o’r opsiynau isod.

Darllenwch fwy am droi allan yn anghyfreithlon ac aflonyddu yma.