Fel arfer dim ond am un cartref ar y tro y gallwch gael Budd-dal Tai. Fodd bynnag, mae amgylchiadau arbennig lle gallai fod yn bosibl i Fudd-dal Tai gael ei dalu am fwy nag un cartref.
Symud cartref
Mae Budd-dal Tai fel arfer yn stopio’r diwrnod y byddwch yn symud allan o’ch cartref.
Budd-dal Tai ar y ddau gartref
Os ydych yn symud o un cartref i’r llall ond bod gorgyffwrdd rhwng diwedd eich hen gontract meddiannaeth a dechrau eich contract newydd, efallai y bydd modd i Fudd-dal Tai gael ei dalu ar gyfer y ddau gartref am hyd at bedair wythnos.
Bydd yn rhaid i chi ddangos na allech osgoi gorgyffwrdd rhwng y contractau meddiannaeth, er enghraifft:
- bu’n rhaid i chi dderbyn y contract yn eich cartref newydd ar unwaith, ond roedd yn rhaid ichi roi rhybudd cyn dod â’r contract yn eich hen fflat i ben.
Budd-dal Tai ar eich hen gartref yn unig
Os ydych wedi symud i gartref newydd lle nad oes yn rhaid i chi dalu rhent, ond bydd yn rhaid i chi dalu rhent ar eich hen gartref o hyd, efallai y byddwch yn gallu cael Budd-dal Tai wedi’i dalu am hyd at bedair wythnos, er mwyn i chi allu rhoi eich landlord yn hysbysu eich bod am adael.
Bydd yn rhaid i chi ddangos na allech osgoi gorfod talu rhent ar ôl i chi symud allan, h.y. ni allech fod wedi gwybod y byddai’n rhaid i chi symud ac felly ni allech fod wedi rhoi rhybudd cyn i chi symud allan. Er enghraifft:
- cawsoch eich cymryd i’r ysbyty yn barhaol
- os cawsoch ddedfryd carchar o fwy na 13 wythnos, neu
- aethoch i aros gyda pherthnasau oherwydd eich bod yn fregus neu’n oedrannus ac ni fyddwch yn gallu dychwelyd adref.
Aros i addasiadau gael eu gwneud
Os na allwch symud i mewn i’ch cartref newydd nes bod addasiadau wedi’u gwneud oherwydd eich bod chi, neu rywun sy’n byw gyda chi, yn anabl, gallwch gael Budd-dal Tai wedi’i dalu am hyd at bedair wythnos cyn i chi symud i mewn. Yn ystod y cyfnod hwnnw, gallwch hefyd yn parhau i dderbyn Budd-dal Tai ar gyfer eich hen gartref.
Mae unrhyw waith i wneud y cartref yn addas ar gyfer y person anabl yn cyfrif, gan gynnwys ailaddurno a charpedu.
Gadael cartref oherwydd ofn trais
Os ydych wedi gadael eich cartref oherwydd ofn trais gallwch gael Budd-dal Tai ar gyfer eich hen gartref a’r cartref yr ydych yn aros ynddo nawr am hyd at 52 wythnos, cyn belled â’ch bod yn bwriadu dychwelyd i’ch hen gartref. Os nad ydych yn bwriadu dychwelyd i’ch hen gartref dim ond am hyd at bedair wythnos y telir Budd-dal Tai ar y ddau gartref.
Gallech fod yn ofni trais gan rywun a oedd yn byw yn eich hen gartref, neu gyn aelod o’r teulu. Mae hefyd yn cynnwys ofn trais gan eich cymdogion, neu ofn ymosodiadau hiliol ar eich cartref.
Os mai dim ond pan fyddwch chi’n mynd y tu allan i’ch cartref y byddwch chi’n ofni trais, rhaid i’r bygythiad fod gan gyn-aelod o’r teulu.
Nid oes rhaid eich bod wedi dioddef trais gwirioneddol. Mae gwir ofn trais yn ddigon, er efallai y gofynnir i chi ddarparu rhywfaint o dystiolaeth o fygythiadau neu aflonyddu.
Mae eich teulu yn rhy fawr i un cartref
Os yw’r cyngor wedi gosod eich teulu mewn dau gartref, oherwydd na allent ddarparu cartref digon mawr i’ch teulu cyfan, gallwch gael Budd-dal Tai ar gyfer y ddau gartref cyhyd ag y bo angen i chi fyw mewn dau gartref.
Sut mae gwneud cais am Fudd-dal Tai ar gyfer dau gartref?
Ni roddir taliadau am ddau gartref yn awtomatig, felly bydd yn rhaid i chi ysgrifennu at adran Budd-dal Tai eich cyngor lleol a gofyn.
I ddod o hyd i gyfeiriad eich cyngor lleol, cliciwch yma.
Os ydych yn ysgrifennu llythyr, cofiwch gynnwys:
- cyfeiriad eich hen gontract meddiannaeth a’r dyddiad y daw’r contract i ben
- cyfeiriad eich contract meddiannaeth newydd a’r dyddiad y mae’r contract yn dechrau, a
- eich rhesymau dros symud a pham nad oedd yn bosibl osgoi gorgyffwrdd.
Defnyddiwch ein llythyr enghreifftiol i’ch helpu.
Os ydych yn ansicr o’ch hawliau, neu os hoffech gael cymorth i ofyn am Fudd-dal Tai ar gyfer dau gartref, cysylltwch â chynghorydd, a fydd yn gwirio a ydych yn gymwys ac yn eich helpu i ysgrifennu at yr adran Budd-dal Tai. Gall cynghorydd helpu hefyd os caiff eich cais am ddau gartref ei wrthod a bod angen help arnoch i herio’r penderfyniad.
Did you find this helpful?
Diweddarwyd y dudalen hon ddiwethaf: Medi 7, 2026
Mae’r wybodaeth sydd ar y wefan hon yn cael ei diweddaru a’i chynnal gan Shelter Cymru a dim ond canllawiau cyffredinol ar y gyfraith yng Nghymru y mae’n eu rhoi. Ni ddylid ei hystyried na dibynnu arni fel datganiad cyflawn nac awdurdodol o’r gyfraith.
